HUNSIA SUNGAH LAM-ETNA THAK

    

Keytext: Isaiah 24: 1, 2, 14, 15

    En un, Topa in leitung hawmsuak sakin gamkhing suaksak ding a, amah in lei maitang huiheek gawpin, a tunga a teng mite thehthang gawp ding hi. Mi khempeuhte' thuakna kibang kim ding hi. Siampite leh mi mawkmawkte silate leh a tote, van leite leh van zuakte, sumneite leh leibate, a hau a zawng, a thuakna uh kibang ding hi. 

        A suaktasun mite in lungdamin la sa ding uh hi. Nitumna lama om mite in Topa a liat mahmahna thu gen ding uh hi. Nisuahna lama om mite in Topa phat ding uh hi. Tuipi dunga teng mite in Topa, Israel-te' Pasian phat ding uh hi.

I. I nuntakna sungah I thuakkhak haksatna te hangin lungkim lohna tawh, dotna tampi kinei thei zela, tua te lak ah:  

            - Eima mawhna hi kilkel lo napi a, bang hang in sih lawh dihdih I hiam? cih te ahi zongin…

           - Eima palsatna hang ahi hetloh pi khat hangin, bang hangin thuak lawh dikdek I hi hiam? cih te leh...

            - Ei khialhna a hi hetlo pi bang hangin ki mawhsakna te thuak kha  i hi hiam, cih te kihel hi.

         Tua bangin haksatna, Lungkhamna te I thuak laitakin thuak-hak kisa mahmah tek a, A haivai dotna a hi..Pasian koi ah om na hiam? ci-in kidong kha thei hi. Germany gam pan in Pasian a muang ngei khat in, Pasian tungah a lungkiat luat man in, GOD IS DEAD Theory("Pasian si hi" cih Upna) hong phuang khia hi.

            Nikhat, Africa gam ah kial nasia takin tunga, mite pen, si ziahziah hi cih thu News sung pan in Kum 13 a pha Steve Job in a muh tak ciangin, a pastor pa kiangah thu dong ding in hong pai hi.

            Steve in, Bangthu hong dong hiam cih leh:

            - Pastor pa aw: "Hi banga Kial tunna te, hih zaha mi a sihna te Pasian in athei tam" ci hi, A sia pan: "Thei lua"….ci in dawng hi. Tua teh dong leu leu a,

            - "Tua ahih leh, Pastor pa aw, Hih kialpi pen, a beisak thei diam?" Ci leuleu a…A sia pan bel: "Bei sak thei lua e, Topa in hih theihloh nei lo hi ven", ci in dawng hi.

            - "Tua ahih leh Bang hangin Pasian in hih kialpi beisak lo hiam?" ci leuleu hi. Pastor pa in, a hih theih zah in Steve dotna te dawng hi mah leh, Steve dotna khempeuh, dawn zawh ding hi lo a hih lam thei hi. 

        Tua dotna pen, Tuni dongmah mi tampi te dotna mah ahi hi. (Hih Steve Job pen, Apple Company te ii CEO ahi ding pa hi- 2011 in Cancer natna tawh hong nusia khin zo hi. A sih in, Kum 56 pha pan hi.) 

             Tua dan mah in, I innkuan sung pan in, khat peuhpeuh nasia takin natna tawh gim in, zato Siavuan ten zong cihna ding thei nawnlo in, inn lam zuan dingin hong ki sawl laitak in, “Aw’ Pasian koi ah om na hiam” ci-in na dong kha ngei hiam? Khiallo hi teh..

LST sungah zong a dong na om uh hi. Tawm ensuk leng...

• Mary leh Martha in zong a it mahmah a sanggam pa Lazarus a sih teh: "Topa aw, hih lai-ah a om hi lecin ka u si hetlo ding hi...na ci hi.
• Topa Zeisu mahmah in zong Singlamteh tungah, "Ka Pasian2, bang hangin kei hong nusia    na hi hiam?" (Mat. 27: 45) na ci hi.
• David in zong na dong hi. (Late 10: 1) Topa aw, bang hangin gamla din' na hi hiam?    Haksat hunin bang hangin nang bucip khong na hi hiam? na ci hi.

        `     Laisiangtho Lui sungah (Habakuk te, Jeremiah, Ezekiel ten zong Pasian na phunsan ngei uh hi. (Topa aw, Mi gilo ahi na gaalte lah, lawhcing nopsa in aa dau uh lah pai mahmah ven, nang hong muang na mite lah cimawh mahmah ung, na ci uh hi. 

          Tua mah bangin, Tu laitak a I thuak ahi haksatna (Hih Pulnatna) a koi dandan hi hong piang a hi phial zongin, I phawk ding ka deih zawkin, Pasian phalna kihel lo in, nang tungah bang mah piang theilo hi, cih thu a hi hi.

II. Laisiangtho siam ten, Leitung ah, Gimna atuam tuam ahi, Zinlinna, meimual Puakkhapna,               Tuikhanna, mencipna, hi banga Natna a tuamtuam te a hong pianna’ a hang’ pen thu 4 tawh       tehkak uh hi.  

1.  Hih (Gimna) te pen, Pasian in hong gawtna hi thei hi ci uh hi. Bang hang hiam cih leh, Mihing te pen, om zia tat zia, sia lua mahmah ta uh ahih man un, Pasian daan a kithuak hi ci uh hi.
2. Hih Leitung mahmah sia lua/teek lua mahmah ta a hih manin, a Leitung ngiatin Ama (Ta-baa-wa) paizia ngiat tawh hih gimna te hong piang hi ding hi,  a ci zong om hi.
3. Satan in mihingte a hong bawlsiat nopna ngiat hanga piang hi, a ci zong om hi. 
4.  Atawpna ah, Zeisu a hong paina dingin Ciaptehna/kigin nading, hi ding hi zong ki ci hi.

            Hih Covid-19 zong koi zaw pen tawh kituak hiam cih bel theithei lo hi hangh. A hi zongin LST tungtawn in I phawk dingin ah, Leitungah a piang khempeuh, Pasian phalna lo tawh, bangmah piang thei lo hi, cih thu ahi hi. A hi zongin, Pasian sangin Satan vaanglian zaw I sak leh bel, hih Gimna te hangin Lungkhamna, Lungkiatna I masuan den mai ding hi.

III. U te naute, tu ni in I phawk ding ka deih leuleu in hih gimna natna te khempeuh a piankhiatna       phualpi in, Pasian kiang pan hi khin lo hi cih thu ahi hi.

            Khat vei vei, Topa aw bang hangin Hih bangin natna te  piangsak na hiam na ci kha hiam?  A taktak in, Leitung ah Gimna khempeuh a piankhiatna bulpi in, I galpa Satan ahi hi. Pasian’ THUNEIHNA pen haza a hih manin, langpan ding hong kipan a, vantungmi 1/3 te hong khem puk pah hi. Vantung pan in guallel ahih man in, Leitungah hong kidenna hi a, A guallelhna hangin thangpai mahmah a, Van ah ka om nawnloh hangin Pasian a lehdo theihna dingin lampi hong zong ta hi.

            Eden huan pan in, Adam te a kipan, Leitung Mihing khempeuhte in, Pasian a muanmawh theihtheih na ding leh, Pasian Itna a telkhial theihna ding uh ze-etna a tuamtuam tawh a hi zongin, tuahsiatna, cimawhna te, hong ngahsak hi. Hih thute pen Job laibu sung pan in, I mu thei hi.

Tua ahih manin Ute Naute, Hih thute I telsiam kei leh, Buaina khat peuhpeuh hong tun ciangin,

•  Pasian mawhsak pah nopna,
• Pasian mahmah langpan nopna, ahi zongin,
• Pasian Uplahna sungah i puuk kha ding hi. Tua pen, Satan’ mungtup hi a, tua bang te hangin, eite tung pan in, Satan pen a lawhcing mahmah hong suak ding hi. 

IV. Hih thu te tawh kizui in, Ute naute aw, Tu laitak a I phuk khak ahi hih, Pulnatna tawh kisai in,         Pasian tung hi ta leh, mimal mahmah tungah hi ta leh, ki mawhsak lo ding hi hangh. Hih Natna     in Leitung a kizel limlim ding hi a, Khat teitei tungtawn pan in a hong piang veve ding thu a hi hi.

            A hi zongin a hoih lam in en kik le hang: Hih natna a hong pian tuungin, Sengam, America, Europe gamte ah, natna ngah te pen, Puuk ziahziah, si ziahziah mawk uh a hih man un, Hi dan in I gam hong tung mawk leh, kibei phial lo ding maw, kidalna ding lah kinei hetlo dinga, bang ci kidal mawk ding, ci in keima tumtak in ka lung himawh mahmah hi. A hi zongin I gam hong tun ciangin tua zah in natna a thuak I om kei hi. Topa min ka phat hi.

Hih Natna hangin I Tedim khua in Phattuamna tampi I ngah zaw cih i mu thei hi.

• Lockdown mun te zong kihong kik ta a, I cina te zong Pasian in damdam in damna hong pia hi.
• I muh ngei loh Zato vante leh, I Zato pi huang sung mahmah ah zong  Building hoih mahmah te, ICU building te cih bangin, building tampi hong ki behlap ta hi.
• Laisiangtho Rom. 8: 28 sunga Pasian in a hong kamciam ahi, “Amah a it eite-a' dingin Pasian in, na khempeuh a hoihlamin piangsak hi”, cih thu ataktak in I mu kha hi.

            I makai te thukhun te thuman na tawh, I hih theihzah in zui thei I hih manin, mi 1 leh 2 a ki behlap phial zongin,hi ciang dinmun a tung thei I hi hi.   

       Hih natna tawh kisai hong om tak ciangin, Makai te in, hih dinga hong sawlte leh, Hih loh dinga hong sawl thukhunte pen, pongman a I zuih lai ding kisam hi. Tua te pen a haksa lua om lo hi. A huampi in enpak leng: 

1.  Khut sil ding.
2. Mask bulh ding.
3. A kul luat kei leh, "Vakkhia se kei un" cih te a hi hi. Kei aituam ngaihsut na ah, "Hi bangin Inn sungah Om hithiat na tawh Leitung a honkhia dingin ka kisa ngei kei hi".                         
4. Omkhopna nei se lo ding. Cihte hi ziau a, a haksa lua om lo hi.

            Tua ahih man in, Thukhunte, Sii-kaan te pen, Gakcipna a bat hangin ei a dingin ahoih mahmah Suahtakna ding na hi zaw thei hi. US gam bangah Human Right ultung sak lua uh a hih man un ki-uk cip, lockdown cipna te sangsiam thei lo uh a, nisim mai in nisim in misi kibeh laplap mai hi.

            Tua mah bangin Pasian deih nuntak zia tawh I kalsuan theihna dingin Pasian in a Thunkhunte, a Thukham te hong pia hi. Langpan sese ding hi lo zaw a, Amah i muanna leh Itna tawh I zuih zawh na dingin I hanciam ding ahi hi. Thukham te pen, vangik puak ding banga hong gaakna hi zenzen lo a. I Suahtak theihna dingin hong piak thukhun te na hi zaw hi. 

• Jame 2: 12 sungah, “Tua ahih manin suahtak theina Thukham (Law of Liberty) tawh kizui-in thukhenna a thuakding mi bangin kampau-in na gamta un” na ci hi.
• I John 5: 3 Pasian i it ciangin ama thupiakte a zui ihi hi. Eite-a' dingin ama thupiakte zuihding a haksa lua hilo hi.

            Covid-19 sunga thukhun te i zuih nop nak leh, a haksa lua a om loh mah bangin, Pasian in a hong piak Thukhun te zong I zuihnop nak leh a haksa lua a om kei hi.

Ka tawp na dingin,   

            Ute naute Leitungah haksatna tampi I thuaklai ding hi. Hih pulnatna sangin zong Buaina dang I thuak kha phial lai ding hi. Tua hun ciangin, I phawk ding den ka deih in,

1.      Leitunga, I Hauhna, I Pilna Siamnate in Hih Natna te hong gum, hong honkhia zo a hih man in, Pasian thu sung lo buang koi mah ah, “Khamuanna leh Kingakna” zong kei ni.

2.  Leitung a Makai te thukhun I nial leh  gawtna, Thongkiat theihna a om theih mah bangin,

Vantung Pasian Thukhun te zong nial in, I zuih nop kei leh, Pasian gawtna Hell, I tung pelmawh ding hi.

Paunak 28: 9 ah, Mi khat in thukham a zuihnop kei leh ama thungetna nangawn Pasian in zakthadahhuai sa hi. na ci hi.

            Ute naute aw: Tu laitak in I tuahkhak ahi hih natna lianpi (Covid-19) hangin  Nang pen, Pasian tawh kinai zaw ki san na hiam? A hih kei leh Pasian tawh kigamla zaw na kisa hiam?

            I galpa Satan in bel Mihing te tungah a sia pen dingin hong bawlsia thei mah ta leh, Satan sangin a vaanglian zaw Pasian nei I hih man in, Topa tung bek mah ah kinga ni cih kong zawn pha nuam hi.

 

Prepared by: Pr. Nangpi

AAS Principal, Lawibual. Tedim

Hih Sermon pen, Shalom Kipawlna(Lawibual)in a hong sehna tawh kizui in, May 24, 2020(Sunday ni), Sun Hun zatna a hi hi.